उद्घोष न्यूज 
तनहुँ
प्रदेश अस्पताल, दमौली, तनहुँको अस्पताल व्यवस्थापन समितिका नवनियुक्त अध्यक्ष बरिष्ठ अधिवक्ता कमला मोहन वाग्लेले बिहीबार पदभार ग्रहण गरेका छन् । बिहीबार अस्पतालमा आयोजित कार्यक्रममा निवर्तमान पदाधिकारीहरूको विदाइ तथा नवनियुक्त अध्यक्षको स्वागत गरिएको हो । कार्यक्रममा अस्पताल प्रमुख डा. परिर्वतन बरालले प्रदेश अस्पताल दमौलीको संक्षिप्त परिचय प्रस्तुत गर्दै उपलब्ध सेवा, विगत तीन वर्ष तथा चालु आर्थिक वर्षको प्रगति विवरण, जनशक्ति अवस्था र भावी योजनाबारे जानकारी गराएका थिए ।
कार्यक्रममा अस्पताल व्यवस्थापन समितिका निवर्तमान अध्यक्ष तथा जिल्ला समन्वय समिति तनहुँक प्रमुख शान्तिरमण वाग्ले तनहुँका प्रमुख जिल्ला अधिकारी रामकृष्ण अधिकारी, कोष तथा लेखा नियन्त्रण कार्यालय तनहुँका प्रमुख अशोक खनाल , उद्योग वाणिज्य संघ तनहुँ अध्यक्ष बैकुण्ठ मिश्र ,सदस्य शुशिला देवी शर्मा ,नेपाल पत्रकार महासंघ तनहुँका अध्यक्ष डिपि अधिकारी , प्रदेश आयुर्वेद चिकित्सालय तनहुँका वरिष्ठ कविराज निरीक्षक शम्भु चपागाई , अस्पतालका कन्सल्टेन्ट चिकित्सक, स्वास्थ्यकर्मी तथा कर्मचारीहरूको उल्लेख्य सहभागिता रहेको थियो । कार्यक्रममा निवर्तमान अध्यक्षबाट नवनियुक्त अध्यक्ष वाग्लेलाई समितिको माइन्युट तथा जिम्मेवारी विधिवत् रूपमा हस्तान्तरण गरिएको थियो । सो अवसरमा निवर्तमान पदाधिकारीहरूको कार्यकालमा अस्पतालको भौतिक पूर्वाधार विकास, जग्गा प्राप्तिमा भएको प्रगति तथा सेवा विस्तारमा पुर्याएको योगदानको मूल्यांकन गर्दै दोसल्ला ओढाई सम्मान गरिएको थियो ।
बरिष्ठ अधिवक्ता समेत रहेका नवनियुक्त अध्यक्ष वाग्लेले अस्पतालको समग्र विकास, सेवा गुणस्तर अभिवृद्धि र जनमुखी स्वास्थ्य सेवा विस्तारलाई प्राथमिकतामा राखेर अघि बढ्ने प्रतिबद्धता व्यक्त गरेका थिए । वाग्लेले निवर्तमान पदाधिकारीहरूको योगदानप्रति धन्यवाद ज्ञापन गर्दै आगामी दिनमा पनि निरन्तर सहयोगको अपेक्षा गरेका थिए । कार्यक्रम अस्पताल प्रमुख तथा अस्पताल व्यवस्थापन समितिका सदस्य–सचिव डा. परिवर्तन बरालको अध्यक्षतामा भएको थियो ।
