तनहुँ
तनहुँको साविक अरुणोदय गा.वि.स.का सचिव कृष्णराज तिमिल्सिनाले छोरा रविकिरण तिमिल्सिनाको विवाहको अवसर पारी सोही ठाउँमा रहेको एक विद्यालयका विद्यार्थीहरुलाई झोला, विद्यालय पोशाक र शैक्षिक सामग्री वितरण गरेका छन ।
भिमाद नगरपालिका २ बिरुवा जौपानी स्थित सिद्ध आधारभूत विद्यालयका विद्यार्थीहरुलाई तिमिल्सिना परिवारले उक्त सामग्री वितरण गरेका हुन । छोरा रविकिरण र स्वीकृति पन्थ दाम्पत्य जीवनमा प्रवेश गरेको अवसर पारी ति विद्यार्थीहरुलाई शैक्षिक सामग्रीहरु वितरण गरेको जानकारी उनले दिए । कृष्णराज, उनका छोरा रविकिरण र बुहारी स्वीकृति पन्थले वडा अध्यक्ष दिनेशकुमार थापा र वि.व्य.स.का अध्यक्ष रामबहादुर थापालाई झोला, विद्यालय पोशाक, शैक्षिक सामग्री हस्तान्तरण गरेका थिए । २९ जना विद्यार्थीहरुलाई तिमिल्सिना परिवारले शैक्षिक सामग्री, झोला र विद्यालय पोशाक वितरण गरेका हुन ।
सोही अवसरमा बोल्दै वडा अध्यक्ष थापाले तिमिल्सिना परिवारले गरेको सहयोगले विद्यार्थीहरुलाई राहत मिलेको बताए । कार्यक्रममा कार्यपालिका सदस्य स्यानीमाया थापा, वडा सचिव गोपालकृष्ण सुवेदी, रेशबहादुर राना, गोविन्द आले, लगायतकाले तिमिल्सिना परिवारले गरेको सहयोग उदाहरणीय र नमुना कार्य भएको बताएका थिए । सामग्री पाउदा विद्यार्थीहरु उत्साहित भएका थिए । शैक्षिक सामग्री वितरण गर्ने तिमिल्सिना परिवारलाई विद्यालयका अध्यक्ष थापाले धन्यवाद दिए ।
