उद्घोष न्यूज 
पहिलो चरणमा व्यास, म्याग्दे, बन्दीपुर, आँबुखैरेनी र देवघाटमा चैत २५-३० सम्म खोप अभियान संचालन हुनेछ । यस्तै शुक्लागण्डकी, भिमाद, ऋषिङ, घिरिङ र भानुमा चैत ३० गतेदेखि वैशाख ३ गतेसम्म खोप अभियान हुने स्वास्थ्य कार्यालय तनहुँले जनाएको छ ।
तनहुँ । तनहुँमा यही चैत २५ गतेदेखि वैशाख ३ गतेसम्म जिल्लाका ८१ हजार भन्दाबढी बालबालिकालाई टाइफाइड विरुद्धको खोप लगाउने तयारी गरिएको छ । दश स्थानीय तह रहेको जिल्लामा ४६९ वटा खोप केन्द्र निर्धारण गरेर एकैसाथ १५ महिनादेखि १५ वर्षमुनिका बालबालिकालाई टाइफाइडविरुद्धको खोप लगाउने तयारी गरिएको हो ।
स्थानीय तहले पठाएको तथ्याङ्क अनुसार जिल्लामा ८१ हजार ३७४ जना बालबालिकालाई उक्त खोप लगाइने भएको छ । एच.एम.आई.एसको आधारिक तथ्याङ्क अनुसार बहने ७३ हजार ३७४ रहेको कार्यालयले जनाएको छ ।
जिल्लाको व्यास नगरपालिका, म्याग्दे गाउँपालिका, बन्दीपुर गाउँपालिका, आँबुखैरेनी गाउँपालिका र देवघाट गाउँपालिकामा चैत २५ गतेदेखि चैत २८ गतेसम्म खोप अभियान संचालन हुनेछ । यस्तै शुक्लागण्डकी नगरपालिका, भिमाद नगरपालिका, ऋषिङ गाउँपालिका, घिरिङ गाउँपालिका र भानु नगरपालिकामा चैत ३० गतेदेखि वैशाख ३ गतेसम्म सो खोप अभियान हुने स्वास्थ्य कार्यालयले जनाएको छ ।
टाइफाइड रोगको सङ्क्रमण र यसबाट हुने जटिलतालाई न्यूनीकरण गर्न नेपाल सरकार, स्वास्थ्य मन्त्रालयको नीतिअनुसार जिल्लाका दशवटै स्थानीय तहमा एकैसाथ खोप अभियान सञ्चालन गर्ने तयारी गरिएको जिल्ला स्वास्थ्य कार्यालय तनहुँका प्रमुख शंकरबाबु अधिकारीले जानकारी दिए ।
“टाइफाइड रोगको सङ्क्रमण सबै उमेर समूहमा हुन्छ, तर १५ वर्षमुनिका बालबालिकामा ११ गुणा बढी हुने एक अध्ययनले देखाएको छ”, उनले भने, “सरकारको नीतिअनुसार सञ्चालन गर्न लागिएको टाइफाइडविरुद्धको खोप अभियान सफल पार्न जिल्लाका सबै संयन्त्र परिचालन गरिएको छ ।”
टाइफाइड रोगविरुद्धको खोप अभियानअन्तर्गत मंगलबार जिल्लास्थित राजनीतिक दल, जनप्रतिनिधि, कार्यालय प्रमुख, सुरक्षा निकाय तथा पत्रकारसँग स्वास्थ्य कार्यालयले अन्तक्र्रिया गर्दैछ।
खोप लगाएपछि खोप लगाएको भागमा रातो हुने, सुन्निने, दुख्ने, हल्का ज्वरो आउने, टाउको दुख्ने, आलस्य लाग्ने, शरीरमा बिमिरा आउने, हातखुट्टा दुख्ने, जोर्नी दुख्ने, वाकवाकी लाग्ने, बान्ता हुनेजस्ता लक्षण देखापर्ने जनाइएको छ । खोप लगाएपछि देखिने लक्षणबाट नआत्तिन र गम्भीर समस्या आइपरेमा तुरुन्तै स्वास्थ्य संस्थामा सम्पर्क गर्न जिल्ला स्वास्थ्य कार्यालय तनहुँले आग्रह गरेको छ ।
जिल्लामा सञ्चालन गर्न लागिएको खोप अभियानमा ६ सय ३२ स्वयंसेवक र ३ सय ६० खोप कार्यकर्ता परिचालन गरिएको प्रमुख अधिकारीले जानकारी दिए । जिल्लालाई भ्याक्सिन ७६ हजार डोज, एडिसिरिन्ज ८० लगायत आवश्यक पर्ने सम्पूर्ण सामग्री तयारी अवस्थामा रहेको स्वास्थ्य कार्यालयले जनाएको छ ।
खोप अभियानको क्रममा दुई वर्षमुनिका बालबालिकाको नियमित खोप दादुरा–रुबेलाको दोस्रो मात्रालगायत अन्य छुट भएका खोपको पहिचान गरी पूर्णखोप सुनिश्चितता र दिगोपना भएको यकिन गरिनेसमेत जनाइएको छ । सुरुमा १५ महिनादेखि १५ वर्षमुनिका बालबालिकालाई अभियानका रूपमा एक मात्र खोप दिइने र सोपश्चात नियमित खोपमार्फत नियमितरूपमा टाइफाइडविरुद्धको खोपसमेत सबै बालबालिकालाई निरन्तर दिइने लक्ष्य रहेको स्वास्थ्य कार्यालयले जनाएको छ ।
एकीकृत स्वास्थ्य सूचना व्यवस्थापन प्रणालीको प्रतिवेदनअनुसार नेपालमा विगत पाँच वर्षको तथ्याङ्कअनुसार हरेक वर्ष करिब चार लाख ५० हजार जनामा टाइफाइडको सङ्क्रमण हुने गरेको तथ्याङ्कमा उल्लेख छ । तथ्याङ्कानुसार पानी र खानेकुराबाट हुने सङ्क्रामक रोगमध्ये टाइफाइड तेस्रो स्थानमा रहेको र अस्पताल भर्ना हुने बिरामीमध्ये चौथो कारण टाइफाइड नै भएको देखिएको छ
जिल्लामा १५ महिनादेखि ४ वर्षसम्मका १३ हजार ६७७ जना बालबालिका रहेका छन् भने ५ वर्षदेखि १५ वर्षसम्मका ६९ हजार ६९७ जना बालबालिका रहेको स्वास्थ्य कार्यालय तनहुँले जनाएको छ ।
