उद्घोष न्यूज 
पोखरा– मुग्लिङ सडक खण्ड चार लेनको निर्माण गर्ने क्रममा पृथ्वीराजमार्गको ढल निकासको नाला भत्किएपछि गएराति देखि परेको अविरल पानीले दमौली बजार जलमग्न बनेको छ । मुख्य सडक र सहायक सडकमा पानी भरिएर सडक छेउका घर र पसलमा पानी पसेको थियो । त्यसपछि नगरपालिकाको जेसिबी र ट्रयाक्टर प्रयोग गरेर ढल व्यवस्थापन गरि पानीको निकास गरिएको छ । नगर उपप्रमुख इन्दिरा दरै र वन वातावरण तथा विपत् व्यवस्थापनका संयोजक रणसिं नेपालीको नेतृत्वमा जलमग्न बनेको तरकारीलाईनमा बिहान देखिनै जेसिबी र ट्रयाक्टर प्रयोग गरेर ढल व्यवस्थापन गरि पानीको निकास गरिएको हो । सडक विस्तारको क्रममा सडक डिभिजनले राजमार्गको सडकको पानीको उचित निकास व्यवस्थापन हुन नसक्दा यस्तो समस्या भएको बताईएको छ । उपप्रमुख इन्दिरा दरैले भनिन्,“राजमार्ग विस्तारको क्रममा छ, सडक विभागले हेर्नुपर्ने हो । अहिले तत्कालको लागि अस्थायी रुपमा ढलको निकास गरिएको छ । ” नगरपालिकाका सहायक ईन्जिनियर प्रदिप पौडेलले राजमार्ग विस्तारको क्रममा नालामा रहेको ह्युमपाइप बन्द भएपछि पानीको निकास बन्द भएको बताए । उनले भने,“राजमार्ग विस्तारको क्रममा नालीहरु भत्किएका छन्, जसले गर्दा पानीको उचित निकास हुन सकेको छैन । ” उनका अनुसार जेसिबीबाट पानीको निकास गरिएपछि तत्कालका लागि समस्या हटेको छ ।
