उद्घोष न्यूज 
काठमाडौं,।माध्यमिक शिक्षा परीक्षा (एसइई) २०८२ को नतिजामा गत वर्षको भन्दा सुधार आएको छ । राष्ट्रिय परीक्षा बोर्डले सोमबार सार्वजनिक गरेको नतिजा अनुसार यस पटक नियमिततर्फ ६५.९८ प्रतिशत परीक्षार्थी उत्तीर्ण भएका छन् ।
यो २०८१ सालको एसइई नतिजाभन्दा चार प्रतिशत धेरै हो । २०८१ सालमा ६१.८१ प्रतिशत परीक्षार्थी उत्तीर्ण भएका थिए । २०८० सालको नतिजामा भने ४८ प्रतिशत मात्रै परीक्षार्थी उत्तीर्ण भएका थिए ।
पछिल्ला तथ्याङ्कले एसइई नतिजामा निरन्तर सुधार आइरहेको देखाएको छ। बोर्डले सोमबार सार्वजनिक गरेको नतिजा अनुसार परीक्षामा कुल चार लाख ३० हजार ६६७ जना परीक्षार्थी सहभागी भएका थिए।
जसमध्ये दुई लाख ८४ हजार १६० जना उत्तीर्ण अर्थात् ग्रेडेड समूहमा परेका छन् । त्यस्तै एक लाख ४६ हजार ५०७ जना अनुत्तीर्ण अर्थात् ननग्रेडेड समूहमा परेका छन् ।
बोर्डले परीक्षार्थीको प्राप्ताङ्क अनुसार छ वटा समूहमा विभाजन गरेर नतिजा सार्वजनिक गरेको छ । जस अनुसार जिपिए ३.६० देखि ४ सम्म ल्याउने परीक्षार्थी ४८ हजार ३९२ जना छन् । जिपिए ३.२० देखि ३.६० सम्म ल्याउने परीक्षार्थी ८० हजार ३९२ जना छन् । जिपिए २.८० देखि ३.२० सम्म ल्याउने परीक्षार्थी ९४ हजार २२२ जना छन् । जिपिए २.४० देखि २.८० सम्म ल्याउने परीक्षार्थी ५५ हजार ९७७ जना छन् ।
एसइई… त्यस्तै जिपिए २ देखि २.४० सम्म ल्याउने परीक्षार्थी पाँच हजार १९० तथा सबैभन्दा तल्लो ग्रेड अर्थात् जिपिए १.६० देखि २ सम्म ल्याउने परीक्षार्थी सात जना रहेको बोर्डका परीक्षा नियन्त्रक (कक्षा १०) टुकराज अधिकारीले बताए।
