उद्घोष न्यूज 
काठमाडौँ । आगामी जेठ पहिलो साता हुने नेकपा ९एकीकृत समाजवादी०को दसौँ राष्ट्रिय महाधिवेशनमा पेस गर्ने ‘दस्ताबेज मस्यौदा समिति’को बैठक आजबाट बस्ने भएको छ । चैत ६ गतेदेखि १० गतेसम्म लगातार बैठक बसेर दस्ताबेजलाई अन्तिम रूप दिने तयारी भएको सो पार्टीका नेताहरूले बताएका छन् ।
‘अध्यक्ष माधवकुमार नेपाल नेतृत्वको २७ सदस्यीय दस्ताबेज मस्यौदा समितिको बैठक मंगलबार ११ बजेबाट बस्दै छ । यो बैठक लगातार चार दिन बस्छ र मस्यौदालाई अन्तिम रूप दिन्छ’, उपमहासचिव समेत रहेका प्रचार विभाग प्रमुख जगन्नाथ खतिवडाको भनाइ छ ।
फागुन १७ गते बसेको सो पार्टीको सचिवालय बैठकले महाधिवेशनमा समसामयिक राजनीतिक, विधान र संगठानिक विषय समेटेर चार जना नेतालाई फरक फरक विषयमा दस्ताबेज लेख्न जिम्मेवारी दिएको थियो । फरक फरक शीर्षकमा दस्ताबेज लेखिए पनि महाधिवेशनमा सबैलाई समेटेर एउटै मात्र दस्ताबेज प्रस्तुत गर्ने सो पार्टीको निर्णय थियो ।
जसअन्तर्गत अध्यक्ष माधवकुमार नेपालले राजनीतिक दस्ताबेज,सम्मानित नेता झलनाथ खनालले समाजवादी कार्यक्रम, उपाध्यक्ष डा बेदुराम भुसालले पार्टी विधान र महासचिव घनश्याम भुसाललाई सङ्गठनात्मक प्रस्तावको मस्यौदा तयार गर्नेगरी जिम्मेवारी बाँडफाँड गरिएको थियो ।
चैत १ गते बसेको दस्ताबेज मस्यौदा समितिको बैठकमा नेता झलनाथ खनालको प्रतिवेदन पेस भएको थियो । बाँकी नेताहरूले आजको बैठकमा आआफ्नो प्रतिवेदन पेस गर्ने र त्यसमा मस्यौदा समितिका २७ जनाकै सुझाव समेटेर अन्तिम रूप दिने तयारी भएको नेता जीवनराम श्रेष्ठले जानकारी दिए ।
