दमौली
जिल्ला प्रशासन कार्यालय तनहुँले पृथ्वी राजमार्गको गाछेपानी–कोत्रे खण्ड तत्काल मर्मत गरी धुलो नउड्ने बनाउन सडक योजना कार्यालयलाई पत्राचार गरेको छ ।
जिल्ला प्रशासनले मंगलबार मुगिलन पोखरा सडक योजना पश्चिम खण्डको कार्यालय पोखरालाई पत्राचार गर्दै पिच बिग्रिएर धुलो उड्ने ठाउँमा नियमित पानी छर्न अनुरोध गरेको हो । यस्तै खाल्डाखुल्डी परेका सडक तत्काल मर्मत गर्न, भत्किएको सडकमा ग्रेडर रोलिङ गर्न र सडक सुधारको काम थालनी गर्दा कोत्रे–गाछेपानी खण्डबाट शुरु गर्ने व्यवस्था मिलाउन समेत पत्रमा अनुरोध गरेको छ ।
भत्किएको पृथ्वीराजमार्गमा उड्ने धुलो, हिलो र खाल्डाखुल्डीले सास्ती दिएको भन्दै आन्दोलनमा उत्रिएको संघर्ष समितिले आज प्रमुख जिल्ला अधिकारी विश्व प्रकाश अर्याल संग समस्या बारे छलफल गरेको थियो ।
प्रमुख जिल्ला अधिकारीले समस्या समाधान हुने वचन दिएकाले तत्काल आन्दोलन स्थगित गरिएको स्थानीय शंकर पन्तले जानकारी दिए । उनका अनुसार समस्या समाधान नभए पुन आन्दोलन थालिने छ । दैनिक १४ सय बढि सवारी साधन चल्ने सडकको दुरावस्थाका कारण स्थानीय र यात्रुले कष्ट भोग्दै आईरहेका छन् ।
