उद्घोष न्यूज 
काठमाडौँ । बाढी पहिरोका कारण थप ६ जिल्लाका ३३ वटा विद्यालयमा क्षति पुगेको छ । शिक्षा, विज्ञान तथा प्रविधि मन्त्रालयले सार्वजनिक गरेको पछिल्लो तथ्यांक अनुसार तेह्रथुम, ललितपुर, सिन्धुली, काभ्रेपलान्चोक, गुल्मी र सुर्खेतका विद्यालयहरूमा पूर्ण तथा आंशिक क्षति पुगेको देखिएको हो ।
काभ्रेपलान्चोकको तेमाल गाउँपालिकामा पहिरोमा परेर तीन जना विद्यार्थीको मृत्यु भएको मन्त्रालयले जनाएको छ ।
कुशेह्वर माविमा अध्ययनरत १ जना र सर्वोद्वार माविमा अध्ययनरत २ जना विद्यार्थीको पहिरोमा पुरिएर मृत्यु भएको मन्त्रालयले जनाएको छ ।
यसअघि पहिलो दिनको तथ्यांक अनुसार १२ जिल्लाका ५३ विद्यालयमा क्षति पुगेको पाइएको थियो । त्यस्तै पहिरोमा पुरिएर ८ जना विद्यार्थीको मृत्यु भएको थियो । त्यस्तै १० हजार ९०० भन्दा बढी विद्यार्थी बाढी पहिरोबाट प्रभावित भएका थिए ।
शिक्षा मन्त्रालयले बाढी पहिरो तथा डुबानका कारण विद्यालयमा पुगेको क्षतिको विवरण संकलन गर्दै आएको छ । रातोपाटी
