उद्घोष न्यूज 
भानु
भानु नगरपालिका, पशुपंछी तथा मत्स्य विकास शाखाले ब्यवसायिक पशुहरूको थुनेलो रोग रोकथामका लागि थुनेलो परिक्षण गरी किसानलाई औषधी सहितका उपचार सामाग्री निःशुल्क वितरण गरेको छ ।
भानु नगरपालिका, पशुपंछी तथा मत्स्य विकास शाखाको आयोजनामा भानु -८ बगालेफाँटमा रहेको प्रगती दुग्ध उत्पादक सहकारी संस्थामा आवद्ध किसानहरुलाई थुनेलो परिक्षण गरी संक्रमण देखिएका पशुहरुलाई उपचारका लागी बेटाडिन, मास्ट मलम, गिलसिरिन र गाईभैसीको थुन उपचारमा सहयोग सामग्री, मिनिरल भिटामिन बितरण गरेको हो ।
आज भएको थुनेलो शिविरमा ५६ जना कृषकहरूको ९६ बटा गाई भैसीको दुधको नमुना संकलन गरी नमुना परिक्षण गरिएको छ । जसमा ५६ गाई र ४० भैसीको दुधको नमुना परिक्षण गर्दा १३ जना कृषकहरुको २३ वटा गाई र १२ वटा भैसी गरी ३५ वटा पशुको दुधमा थुनेलो संक्रमण देखिएको पशु सेवा प्राबिधिक अमित ढुंगानाले बताउनु भयो ।
थुनेलो देखिएको पशुहरुलाई औषधी सहितको सामाग्री वितरण अघि उपचार तथा कप प्रयोग विधि सहित थुनेलो रोगका लक्ष्यण, यसका असर सहित रोग लाग्न नदिन उपायका विषयमा प्रशिक्षण पनि गरिएको थियो ।
भानु(८ र ९ का पशुपालन फार्म संचालक किसानहरुलाई भानु नगरपालिका, पशुपंछी तथा मत्स्य विकास शाखाका शाखा प्रमुख डा शुशिल ऐरी, पशु सेवा प्राबिधिक महेन्द्र अधिकारीले सहजीकरण र उपचार सामाग्री वितरण गरेका थिए ।
पछिल्लो समय विशेषगरी गाईमा र भैसीमा यो रोगको प्रकोप बढिरहेको पाईएको छ । रोगका कारण दुध उत्पदनमा कमि हुने र पशुको स्वास्थ्यमा समेत गम्भीर असर पर्दा किसानको लगानी ढुब्ने गरेको छ ।
दुहुनो गाई भैसिको सरसफाईमा किसानको लापरवाही सँगै अज्ञानताका कारण हुने संक्रमणबाट यो रोग लाग्ने गरेको छ । लामो समय लगाएर उपचारमा मोटो रकम खचिनु पर्ने भएकाले रोग लाग्नै नदिन सरकारले सहयोग गरेको थियो ।
कार्यक्रममा सहकारी संस्थाका अध्यक्ष खडानन्द ढकाल, संचालक सन्तोष बजगाई, प्राविधिक अनिता बिक, श्रवण कोइराला, सन्दिप ढकाल लगायतको समेत सहभागिता थियो ।
