उद्घोष न्यूज 
भक्तपुर — भक्तपुरको राधेराधेमा कारले ठक्कर दिँदा एक पैदलयात्रुको मृत्यु भएको छ । कारको ठक्करबाट जनकपुर स्थायी घर भइ हाल राधेराधे बस्ने ५८ वर्षीय योगराज बरालको ज्यान गएको हो ।
बिहीबार बिहान साढे छ बजे मध्यपुरथिमि नगरपालिका-९ निकोसेरास्थित दुवाकोट मोडबाट पुरानो ठिमीतर्फ जाँदै गरेको वाग्मती प्रदेश ०२-०४१प ३३१९ नं.को मोटरसाइकल र पुरानो ठिमीबाट राधेराधेतर्फ आउँदै गरेको बा.५ च.२०४९ नं.को कार एक-आपसमा ठोक्किएका थिए । मोटरसाइकलसँग ठोक्किएपछि अनियन्त्रित भएको कारले पैदलयात्रा गरिरहेका बराललाई ठक्कर दिएको थियो ।
दुर्घटनामा परी गम्भीर घाइते भएका बराललाई उपचारका लागि भक्तपुर अस्पताल लगिएको थियो । उनको उपचारकै क्रममा अस्पतालमै ज्यान गएको जिल्ला प्रहरी परिसर भक्तपुरका डिएसपी बसन्त पाठकले जानकारी दिए ।
दुर्घटनामा घाइते मोटरसाइकल चालक चाँगुनारायण नगरपालिका-२ का मिलन कार्कीसमेत घाइते भएका थिए । उनी सामान्य उपचारपछि डिस्चार्ज भएका छन् ।
प्रहरीले मोटरसाइकल चालक कार्की र कार चालक मध्यपुरथिमि नगरपालिका-६ बस्ने अनुज प्रजापति दुवैलाई नियन्त्रणमा लिएर अनुसन्धान अघि बढाएको छ ।
