तनहुँ ३० फागुन
जिल्लाको पुर्वी नाका पर्ने आँबुखैरेनी गाउँपालिकाले कार्यपालिका बैठक भत्ता शिक्षक शिक्षिकाको तलबमा खर्च गर्ने गरिएको छ । उक्त बैठकबाट प्राप्त हुने भत्ता रकमले बाह्र जना स्वयसेविका शिक्षक शिक्षिकलाई मासिक रु।बीस हजारका दरले तलब प्रदान गरेको हो ।
त्यसैगरी कार्यपालिका सदस्यहरुको भत्ताबाट एक शिक्षकलाई मासिक रु।बीस प्रदान गरिएको गाउँपालिकाका प्रमुख प्रशासकीय अधिकृत बिष्णु प्रसाद शर्माले जानकारी दिए ।
सामुदायिक विद्यालयको शैक्षिक गुणस्तर बृद्धि गर्न गाउँपालिका कार्यालयले शैक्षिक क्षेत्रमा प्राथामिकता दिएर काम गदै आएको छ । गाउँपालिकाले आगामी बैशाखदेखि कम्तीमा दुई वटा स्कूल बस सामुदायिक विद्यालयलाई प्रदान गरी सेवा संचालन गर्न लागेको छ ।
गाउँपालिका कार्यालयले जेष्ठ नागरिक, सुत्केरी महिला,अपाङ्गता, असहाय, गरीबका लागि निशुल्क एम्बुलेन्सको व्यवस्था गरेको उनले बताए । काठमाण्डौं,चितवन,पोखरा लगायतका शहरमा निशुल्क एम्बुलेन्स उपलव्ध गराइएको उनले जानकारी दिए ।
गाउँपालिका भित्र करको दायरमा आएका व्यवसायीलाई २० प्रतिशत एम्बुलेन्स सेवामा छुटको व्यवस्था गरेको गाउँपालिका कार्यालयले जनाएको छ ।
गाउँपालिकाले एम्बुलेन्स खरीद गरी नाफामुखी भन्दा पनि सेवामूलक भावनाले काम गर्दै आएको गाउँपालिकाका अध्यक्ष शुक्र चुमानले जानकारी दिए । एम्बुलेन्सलाई आवश्यक पर्ने तेल र चालकको तलबको लागि तलब खुवाउन सहयोग पुगेको बताइएको छ ।
नागरिक सेवा कक्ष
त्यसैगरी गाउँपालिका कार्यालयले कार्यालयको पहिलो तलामा नागरिक सेवा कक्ष संचालनमा ल्याएको छ । सेवाग्राहीले सेवा लिन कोठा कोठा चार्हनुपर्ने समस्या रहेकोले एकै स्थानबाट सेवा दिन नागरिक सेवा कक्ष शुरुवात गरेको हो । निवेदन,फोटोकपी,नक्सापास लगायतका सेवामा गाउँपालिकाले निःशुल्क व्यवस्था गरेको छ ।
