उद्घोष न्यूज 
काठमाडौं । साउदी अरबले लाल सागरमा अवस्थित आफ्नो यान्बु बन्दरगाहबाट तेल लोडिङ बन्द गरेको छ। समाचार एजेन्सी रोयटर्सले सिपिङ स्रोतहरूलाई उद्धृत गर्दै उक्त बन्दरगाहबाट तेलको लोडिङ रोकिएको जनाएको छ।
यो खबर सार्वजनिक भएसँगै मंगलबार विश्व बजारमा कच्चा तेलको मूल्य प्रतिब्यारेल करिब ३ डलरले बढेको छ।
बीबीसीका अनुसार, साउदी अरबले युरोपेली खरिदकर्ताहरूलाई सेप्टेम्बरको अन्त्यका लागि तय गरिएको कच्चा तेलको आपूर्ति रद्द गरिएको जानकारी गराइसकेको छ।
तीन दिनअघि भएको ड्रोन आक्रमणपछि साउदी अरबले आफ्नो पूर्व-पश्चिम पाइपलाइनमार्फत हुने तेल आपूर्ति रोकिसकेको छ।
यस पाइपलाइनले साउदी अरबलाई होर्मुज स्ट्रेट पार नगरीकनै यान्बु बन्दरगाहसम्म र त्यहाँबाट स्वेज नहर हुँदै युरोपसम्म तेल पुर्याउन मद्दत गर्दै आएको थियो। यस पाइपलाइनको प्रयोगका कारण तेलवाहक जहाजहरूलाई सुरक्षा जोखिमयुक्त बाब अल-मन्डेब जलमार्ग भएर जानु अनिवार्य थिएन।
तर, पछिल्ला दिनहरूमा इरान समर्थित सशस्त्र समूहले बाब अल-मन्डेबमा नियन्त्रण कायम गरेपछि साउदी अरबको सुरक्षा चिन्ता झनै बढेको छ।
गत फेब्रुअरी २८ मा युद्ध सुरु भएयता साउदी अरबको सरकारी तेल कम्पनी ‘साउदी अरामको’ ले यान्बु टर्मिनलको प्रयोग बढाएको थियो। तर, अरामकोले तेल लोडिङ रोकिएको यस पछिल्लो घटनाबारे कुनै पनि टिप्पणी गर्न अस्वीकार गरेको छ।
लिबियामा पनि तेल आपूर्ति प्रभावित
बीबीसीका अनुसार, विश्वव्यापी तेल आपूर्तिमा सङ्कट गहिरिँदै जाँदा लिबियाबाट पनि यस्तै खबर आएको छ।
लिबियाले पनि आफ्ना तीनवटा तेल क्षेत्रमा यातायात रोकेको छ। यसले विश्व बजारमा तेल आपूर्तिको चिन्तालाई अझ बढाएको छ।अनलाइनखबर
