उद्घोष न्यूज 
काठमाडौँ । ओलम्पिक खेलकुदको ३३औँ संस्करण फ्रान्सको राजधानी सहर पेरिसमा आयोजना हुँदै छ । विश्व खेलकुदको महाकुम्भ ओलम्पिकको उद्घाटन समारोह जुलाई २६ तारिखमा र समापन समारोह अगस्त ११ तारिखमा हुनेछ ।
पेरिस ओलम्पिकमा एक सय ९६ राष्ट्रका १० हजार ६ सयभन्दा बढी खेलाडीको सहभागिता रहने बताइएको छ । पेरिस ओलम्पिकमा अफगानिस्तानको सहभागिताको विषयलाई लिएर लामो समयदेखि विभिन्न अनुमान गरिँदै आएको थियो ।
खासमा अफगानिस्तानमा यतिबेला तालिबानको शासन छ । तालिबानले सन् २०२१ को अगस्तमा सत्ता आफ्नो हातमा लिएका थिए । त्यसको प्रभाव देशको खेल गतिविधि र अन्तर्राष्ट्रिय सहभागितामा पनि पर्ने अनुमान गरिएको थियो ।
पेरिस ओलम्पिकमा पनि यसको असर पर्ने अनुमान गरिँदै आएको थियो । तर, अन्तर्राष्ट्रिय ओलम्पिक कमिटी (आईओसी) ले पेरिस ओलम्पिकमा अफगानिस्तानको सहभागितालाई सशर्त मन्जुरी दिएको छ । समाचारमा जनाइए अनुसार, अफगानिस्तानका तीन महिला र तीन पुरुष गरी कुल ६ खेलाडीले पेरिस ओलम्पिकमा भाग लिनेछन् ।
अफगानिस्तानका खेलाडीले पेरिस ओलम्पिकमा साइक्लिङ, एथलेटिक्स र पौडीमा सहभागिता जनाउने छन् । तर, आईओसीले तालिबानी अधिकारीहरूलाई भने औपचारिक रूपमा ओलम्पिकमा उपस्थित हुनबाट रोक लगाएको छ ।
यसैगरी आईओसीले ओलम्पिकमा तालिबानी झण्डाको प्रयोग गर्नबाट पनि रोक लगाएको छ । यसका अतिरिक्त पेरिस ओलम्पिकमा अफगानिस्तानीमुलका पाँचजना शरणार्थी खेलाडीले पनि सहभागिता जनाउने भएका छन् । तर, यी शरणार्थीले आईओसीको झण्डामुनि रहेर ओलम्पिक खेल्नेछन् ।
खासमा यी शरणार्थीले अफगानिस्तानको पछिल्लो राजनीतिक अवस्थाका कारण देश छोडेका थिए । उनीहरुले आईओसी समक्ष ओलम्पिक खेल्नका लागि निवेदन गरेका थिए । त्यसपछि आईओसीले उनीहरूको आग्रह स्विकार्दै ओलम्पिक खेल्ने वातावरण बनाएको हो ।
